Wilujeng Poé Guru. Mugia dunya atikan terus nanjung, luhung apanjang-apunjung. Minangka pangéling ka sadaya guru nu teu kendat ngagalindengkeun élmu jeung kadeudeuh langgeng, urang sami-sami lenyepan jeung haleuangkeun Guguritan karya suwargina Wahyu Wibisana, nu hamo laas ku jaman.
KINANTI
NINUN NAON MUNGGUH GURU
Ninun naon mungguh guru,
kentreung deui kentreung deui,
taun-taun di sakola,
taropong benang pangatik,
sorolok pakan panalar,
tut wuri jeung handayani.
Ninun naon mungguh guru,
ninun pribadi sing jadi,
nu terang jalan ka jaga,
néangan jatining hurip,
pikeun waluyana bangsa,
nagara jeung lemah cai.
Ninun naon mungguh guru,
ninun kasurtian diri,
da diri jadi érétan,
nu meuntaskeun putra-putri,
geus meuntas itu gugupay,
gupay-gupay duh anaking.
Ninun naon mungguh guru,
ninun padungdengan ati,
da haté sok rajeun waswas,
paur gawé henteu hasil,
nyangga pancén di sakola,
ngatik kabéh siswa-siswi.
111185
(Dicutat tina Kumpulan Guguritan “Riring-riring Tjiawaking”, karya Wahyu Wibisana, Pamedal Geger Sunten, 1999).
